Brynjulf Jung Tjønn (uten tittel)

eg drøymde at mor gjekk hand i hand med syster
mi langs fjorden, at dei gjekk berrføtte langs den
steinete stranda, at syster mi lente seg inntil mor, syster
mi hadde langt, nyvaska hår, som flagra, som tynne
lauvblad, mor og syster mi var hekta saman, armane
deira hadde vakse seg inn i kvarandre, som røter gjer
under jorda, og mens dei gjekk langs fjorden, blei dei
gradvis meir og meir til to lauvtre med hår i vinden, to
tre vikla inn i kvarandre som snart stansa ved ein båt,
dei sette seg i båten, båten glei ut i fjorden, dei var der
ute i bølgene, to tre og ein båt, det begynte å regne og
mørket kom over bygda, og vinden kom sterkare ute
frå havet og innover fjordarmen, og hender av bølger
velta båten over ende, og då sokk mor og syster mi
til botnen, føtene deira hekla seg inn i algane, algane
heldt dei fast, men til slutt klarte mor å rive seg laus,
ho svømte til overflata og steig opp frå tjernet inne
i skogen, mens syster mi blei igjen der nede, aleine,
krølla saman til ein klump av kjøt, eit hjarte som hadde
falle ut av ein kropp


****************************************************

(fra Garden under jorda,  2019)